Чулпыч

XVIII йөзнең беренче утызъеллыгында нигезләнә. Революциягә кадәрге чыганакларда шулай ук Челпыш буларак та искә алына.

XVIII йөздә – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында авылда мәчет, тимерчелек, вак-төякләр кибете эшли. Авыл җәмәгатенең имана җире 846,9 дисәтинә тәшкил итә.

1920 елга кадәр авыл Казан губернасының Мамадыш өязе Сатыш волостена керә.

1920 елдан – ТАССРның Мамадыш кантонында. 1930 елның 10 августыннан – Саба районында.

Хәзер – Олы Шыңар авыл җирлегендә.

Күмәкләштерүнең беренче елларында «Кызыл Чулпыч» колхозы оештырыла (беренче рәисе – Г.Гәрәев). 1956 елдан авылда – «Авангард» (авылда үзәк утар урнаша; хуҗалыкка Оет авылы да керә, 1959 елда үзәк утар Олы Шыңар авылына күчерелә), 1990 елдан – «Оет» колхозлары, 1994 елдан – «Оет» күмәк предприятиесе, 2008 елдан – «Саба» җаваплылыгы чикләнгән җәмгыяте «Оет» бригадасының Сатыш филиалы, 2011 елдан «Туган як» җаваплылыгы чикләнгән җәмгыяте эшли.

Халкы башлыча игенчелек һәм терлекчелек белән шөгыльләнә.

1934–2007 елларда – башлангыч мәктәп, 1934–2011 елларда клуб эшли. Авылда мәчет (2008 елдан) бар.

А.М.Гарипов (1960 елда туган) – укытучы, төбәк тарихчысы;

К.Г.Хәсәнов (1878–1949) – укытучы, II Дәүләт думасы депутаты.

1782 елда – 42 ир-ат;
1859 елда – 205,
1897 елда – 325,
1908 елда – 402,
1920 елда – 381,
1926 елда – 390,
1938 елда – 400,
1949 елда – 370,
1970 елда – 161,
1979 елда – 145,
1989 елда – 107,
2002 елда – 80,
2010 елда – 71,
2020 елда – 59 кеше (татарлар).