Бакшанды

XVI йөздә нигезләнә. XVIII йөздә – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук йон тетү, киез басу һәм тегүчелек тарала.

XX йөз башында авылда мәчет (1930 елларда ябыла), вак-төякләр кибете эшли. Авыл җәмәгатенең имана җире 392,4 дисәтинә тәшкил итә.

1920 елга кадәр авыл Казан губернасының Мамадыш өязе Яңа Чүриле волостена керә.

1920 елдан – ТАССРның Мамадыш, 1922 елдан – Арча кантонында. 1930 елның 10 августыннан – Саба, 1944 елның 19 февраленнән – Чүриле, 1956 елның 14 маеннан – Саба районында.

Хәзер – Мичән авыл җирлегендә.

1931 елда «Бакшанды» колхозы оештырыла (беренче рәисе – Нигъмәтҗанов). Соңрак хуҗалыкның исеме «Радио» колхозы итеп үзгәртелә.

1951 елдан авылда «Кызыл партизан» колхозы (үзәк утары – Керәнле авылы), 1959 елдан, «Яңа көч» колхозы (үзәк утары – Яңа Мичән авылы) белән берләштерелгәннән соң – эреләндерелгән Тукай исем. колхоз (үзәк утары – Иске Мичән авылы), 1993 елдан – «Керәнле» (үзәк утары – Керәнле авылы), 2000 елдан – Тукай исем. (үзәк утары – Иске Мичән авылы) күмәк предприятиеләр, 2008 елдан «Саба» җаваплылыгы чикләнгән җәмгыятенең «Мичән» бүлекчәсе эшли.

Совет чорында башлангыч мәктәп (1918 елдан) һәм клуб эшли (1930 еллардан).

1859 елда – 148,
1897 елда – 289,
1908 елда – 343,
1920 елда – 359,
1926 елда – 290,
1938 елда – 256,
1970 елда – 155,
1979 елда – 82,
1989 елда – 44,
2002 елда – 19,
2010 елда – 16,
2020 елда – 11 кеше (татарлар).