Кибәк Иле

Казан ханлыгы чорыннан мәгълүм.

XVIII йөздә – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында авылда мәчет, икмәк саклау-сату, вак-төякләр кибетләре эшли. Авыл җәмәгатенең имана җире 693 дисәтинә тәшкил итә.

1914 елда мәдрәсә ачыла.

1920 елга кадәр авыл Казан губернасының Лаеш өязе Аркатау волостена керә.

1920 елдан – ТАССРның Лаеш, 1927 елдан – Арча кантонында. 1930 елның 10 августыннан – Питрәч районында.

Хәзер – Кибәк Иле авыл җирлеге үзәге.

1930 елда (башка мәгълүматлар буенча, 1933 елда) – колхозчы-ударникларның икенче съезды исем., 1950 елда (башка мәгълүматлар буенча, 1955 елда) Жданов исем. (авылда үзәк утар урнаша) колхозлар оештырыла.

1960 елдан авылда – «Искра» колхозы (үзәк утары – Белкино авылы), 1983 елдан – бүленеп чыккан Тукай исем. колхоз, 1995 елдан – шул ук исемдәге күмәк предприятие, 1997 елдан – авыл хуҗалыгы җитештерү кооперативы, 2005 елдан – «Тукай исем. агрофирма» җаваплылыгы чикләнгән җәмгыяте, 2007 елдан – «Авангард» җаваплылыгы чикләнгән җәмгыяте, 2009 елдан «Герефорд» нәсел хуҗалыгы» җаваплылыгы чикләнгән җәмгыяте эшли.

Халкы башлыча үсемлекчелек һәм терлекчелек белән шөгыльләнә.

1922 елда мәдрәсә җирлегендә башлангыч мәктәп ачыла, 1990 елда – тулы булмаган урта (1996 елдан – яңа бинада), 2011 елда – башлангыч мәктәп, 2013 елда Надеждино мәктәбе филиалы итеп үзгәртелә.

Авылда мәдәният йорты (1976 елдан), китапханә (1991 елдан, төп фонды Аркатау авылыннан китерелә), фельдшер-акушерлык пункты, мәчет (1992 елдан) бар.

Мәдәният йорты каршында «Асылъяр» татар җыры ансамбле (2009 елдан), «Сәләт» театр коллективы (2019 елдан) эшли.

1782 елда – 42 ир-ат;
1859 елда – 228,
1897 елда – 338,
1908 елда – 409,
1920 елда – 420,
1926 елда – 436,
1949 елда – 433,
1958 елда – 351,
1970 елда – 365,
1979 елда – 355,
1989 елда – 283,
2002 елда – 283,
2010 елда – 242,
2020 елда – 200 кеше (татарлар).