Чуча

1654 елдан Яңа Чеча буларак мәгълүм. Революциягә кадәрге чыганакларда Богородский исеме белән дә искә алына.

1861 елгы реформага кадәр халкы алпавыт крестьяннары (крепостнойлар А. һәм М.Стрелковлар) катлавына керә, 2 авыл җәмәгатенә бүленә. Бу чорда халкының төп шөгыльләре – игенчелек һәм терлекчелек. 1869 елда халыкның бер өлеше Мамадыш өязенең (хәзер Кукмара районы) Биер поселогына күченә.

XX йөз башында чиркәү-приход мәктәбе (1889 елда ачыла), 2 икмәк саклау-сату, 3 вак-төякләр кибете җил тегермәне, чана һәм арба ясау остаханәсе эшли.

Авыл җәмәгатенең имана җире 1262,5 дисәтинә тәшкил итә.

1920 елга кадәр авыл Казан губернасының Лаеш өязе Пановка волостена керә.

1920 елда – ТАССРның Лаеш, 1927 елдан – Арча кантонында. 1930 елның 10 августыннан – Питрәч районында.

Хәзер – Кавал авыл җирлегендә.

1931 елда авылда “Борьба за социализм” колхозы оештырыла. 1958 елдан – “Дружба” совхозы, 1963 елдан – “Россия” колхозы (үзәк утары – Кавал авылы), 1997–2006 елларда “Кавал” авыл хуҗалыгы җитештерү кооперативы эшли.

Халкы башлыча үсемлекчелек белән шөгыльләнә.

1782 елда – 31 ир заты;
1859 елда – 253,
1897 елда – 502,
1908 елда – 547,
1920 елда – 519,
1926 елда – 579,
1949 елда – 229,
1958 елда – 248,
1970 елда – 125,
1979 елда – 75,
1989 елда – 51,
2002 елда – 18,
2010 елда – 18,
2020 елда – 11 кеше (руслар).