Кече Колбай-Мораса

XVIII йөзнең беренче яртысында нигезләнә. Революциягә кадәрге чыганакларда Новопоселенная Мураса исеме белән дә искә алына.

1861 елгы реформага кадәр халкы алпавыт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында тимерчелек, шәраб һәм вак-төякләр кибете эшли. Авыл җәмәгатенең имана җире 116 дисәтинә тәшкил итә.

1920 елга кадәр авыл Казан губернасының Чистай өязе Иске Әлмәт волостена керә. 1920 елдан – ТАССРның Чистай кантонында. 1930 елның 10 августыннан – Биләр, 1963 елның 1 февраленнән – Октябрь, 1997 елның 10 декабреннән – Нурлат районында.

Хәзер – Колбай-Мораса авыл җирлегендә.

1931 елда авылда «Пробуждение» колхозы оештырыла. 1954 елдан – Сталин исемендәге (үзәк утары – Колбай-Мораса авылы), 1961 елдан – «Алга» (үзәк утары – Колбай-Мораса авылы) колхозлары, 1994 елдан – «Алга» крестьян-фермер хуҗалыклары ассоциациясе, 2000 елдан – «Алга» авыл хуҗалыгы кооперативы, 2006 елдан – «Мораса», 2009 елдан – «ВЗП Билярск» җаваплылыгы чикләнгән җәмгыятьләре эшли.

1782 елда – 47 ир-ат;
1859 елда – 304,
1897 елда – 376,
1908 елда – 584,
1920 елда – 522,
1926 елда – 399,
1938 елда – 347,
1949 елда – 192,
1958 елда – 168,
1970 елда – 159,
1979 елда – 145,
1989 елда – 93,
2002 елда – 89,
2010 елда – 60,
2021 елда – 57 кеше (руслар).