Чуаш Тимерлеге

1681 елдан Исенеева исеме белән мәгълүм. 1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында тимерчелек, 3 вак-төякләр кибете эшли. Авыл җәмәгатенең имана җире 873 дисәтинә тәшкил итә.

1920 елга кадәр авыл Казан губернасының Чистай өязе Иске Әлмәт волостена керә. 1920 елдан – ТАССРның Чистай кантонында. 1930 елның 10 августыннан – Октябрь, 1935 елның 10 февраленнән – Тельман, 1958 елның 16 июленнән – Октябрь, 1997 елның 10 декабреннән – Нурлат районында.

Хәзер – Тимерлек авыл җирлеге үзәге.

1917 елга кадәр Тимерлек урманчылыгы участогы эшли. 1927 елда аның мәйданы 39038 га тәшкил итә. 1929 елдан урманчылык Чистай урман сәнәгате хуҗалыгына карый, 1936 елдан – Тельман урман хуҗалыгына, 1959 елдан – Тельман урман сәнәгате хуҗалыгына, 1963 елдан Октябрь урман сәнәгате хуҗалыгына керә. 1987 елдан участок урманчылыгы конторасы урнаша.

1931 елда авылда «Херле Ялав» («Красное знамя») колхозы оештырыла. 1950 елдан – берләштерелгән Молотов исемендәге колхоз (авылда үзәк утар урнаша; шулай ук Рус Тимерлеге, Сосновка авыллары, Красномайский поселогы хуҗалыклары керә), 1957 елдан – «Заря» колхозы, 1959 елдан – «Заря коммунизма» колхозы (авылда үзәк утар урнаша; шулай ук Кирпичный, Югары Стекольный, Рус Тимерлеге, Сосновка авыллары, Красномайский, Түбән Стекольный, Рождественский поселоклары хуҗалыклары керә), 1969 елдан – «Мамык» совхозы (авылда үзәк утар урнаша), 1994 елдан – «Мамык» крестьян хуҗалыклары ассоциациясе, 1997 елдан – Нурлат РСУ ярдәмче хуҗалыгы, 2003 елдан – «Тимерлек», 2006 елдан – «Раздолье» җаваплылыгы чикләнгән җәмгыятьләре, соңрак «Сөләйманов Ә.И.» крестьян-фермер хуҗалыгы эшли.

Халкы башлыча «Сөләйманов Ә.И.» крестьян-фермер хуҗалыгында, участок урманчылыгында эшли, кырчылык, ит-сөт терлекчелеге белән шөгыльләнә.

1938 елда башлангыч мәктәп ачыла, ул 1962 елда – сигезьеллык (1977 елда яңа бина төзелә), 1985 елда – урта, 2011 елда тулы булмаган урта мәктәп итеп үзгәртелә, 2015 елда аңа Советлар Союзы Герое Н.А.Козлов исеме бирелә. 1997 елда мәктәп каршында туган якны өйрәнү музее оештырыла (оештыручысы – Т.М.Машарова).

Мәдәният йорты, китапханә (1920 елда уку йорты буларак ачыла, 1961 елдан яңа клуб бинасында), фельдшер-акушерлык пункты, кәшәнә (2011 елдан) бар.

Мәдәният йорты каршында «Пилеш» («Рябинушка») чуаш җыр ансамбле (2000 елдан, оештыручысы – В.Г.Тарасов) эшли.

1859 елда – 289,
1897 елда – 401,
1908 елда – 462,
1920 елда – 511,
1926 елда – 458,
1938 елда – 487,
1949 елда – 331,
1958 елда – 495,
1970 елда – 636,
1979 елда – 493,
1989 елда – 486,
2002 елда – 489,
2010 елда – 492,
2021 елда – 358 кеше (чуашлар – 87%, руслар – 12%).