Иске Сәет

1735 елдан мәгълүм. Революциягә кадәрге чыганакларда Сәет исеме белән телгә алына.

XVIII–XIX йөзләрдә халкы асаба башкортлар һәм типтәрләр катлавына керә. Бу чорда халкының төп шөгыле – игенчелек һәм терлекчелек, шулай ук чана ясау һәм мич чыгару кәсепчелеге тарала.

1870 ел мәгълүматлары буенча, авылда мәчет һәм мәктәп була. Авыл җәмәгатенең имана җире 1202,2 дисәтинә тәшкил итә.

1920 елга кадәр Уфа губернасының Минзәлә өязе Әмәкәй волостена керә. 1920 елдан ТАССРның Минзәлә кантонында. 1930 елның 10 августыннан – Мөслим, 1935 елның 10 февраленнән – Калинин, 1959 елның 12 октябреннән – Мөслим, 1963 елның 1 февраленнән – Сарман, 1965 елның 12 гыйнварыннан Мөслим районында.

Хәзер Исәнсеф авыл җирлеге составында.

1930 елда авылда Молотов исемендәге колхоз (беренче рәисе – А.Исрафилов) оештырыла, 1948 елда – “Сатурн” колхозы (Татар Бүләре авылы), 1957 елда – берләштерелгән “Урожай” колхозы составына керә. 1994 елдан “Уңыш” күмәк предприятиесе, 2018 елдан “Август-Мөслим” җаваплылыгы чикләнгән җәмгыяте.

Халкы күбесенчә крәстиян-фермер хуҗалыкларында һәм “Август-Мөслим” җаваплылыгы чикләнгән җәмгыятендә эшли, кырчылык белән шөгыльләнә.

1940 елда авылда башлангыч мәктәп (2010 елга кадәр эшли) һәм клуб (яңа бина төзелә) ачыла, фельдшер-акушерлык пункты бар.

1816 елда – 128 ир-ат;
1834 елда – 316,
1859 елда – 605,
1870 елда – 700,
1884 елда – 1010,
1897 елда – 887,
1913 елда – 638,
1920 елда – 688,
1926 елда – 358,
1938 елда – 466,
1949 елда – 298,
1958 елда – 262,
1970 елда – 256,
1979 елда – 228,
1989 елда – 132,
2002 елда – 93,
2010 елда – 87,
2017 елда – 66 кеше (татарлар).