Исәнсеф

1693 елдан мәгълүм.

XVIII–XIX йөзләрдә халкы асаба башкортлар һәм типтәрләр катлавына керә. Бу чорда халкының төп шөгыле – игенчелек һәм терлекчелек, шулай ук умартачылык, балта эше кәсепчелеге тарала.

1870 елгы мәгълүматлары буенча, авылда мәчет, мәктәп һәм су тегермәне була.

Авыл җәмәгатенең имана җире 1545,7 дисәтинә тәшкил итә.

1920 елга кадәр Уфа губернасының Минзәлә өязе Пучы волостена керә. 1920 елдан ТАССРның Минзәлә кантонында. 1930 елның 10 августыннан – Мөслим, 1935 елның 10 февраленнән – Калинин, 1959 елның 12 октябреннән – Мөслим, 1963 елның 1 февраленнән – Сарман, 1965 елның 12 гыйнварыннан Мөслим районында.

Хәзер Исәнсеф авыл җирлеге составында.

1929 елда авылда “Ленин бүләге” колхозы оештырыла (беренче рәисе – А.Шәвәлиев), 1948 елда аның составына “Кызыл таң” колхозы (Чишмә авылы) керә, 1957 елда “Сатурн” колхозы белән “Урожай” колхозына берләштерелә. 1994 елдан “Уңыш” күмәк предприятиесе, 2018 елдан “Август-Мөслим” җаваплылыгы чикләнгән җәмгыяте.

Халкы күбесенчә крәстиян-фермер хуҗалыкларында эшли, кырчылык, ит терлекчелеге белән шөгыльләнә.

Авылда балалар бакчасы (1988 елдан), клуб (1988 елда яңа бина төзелә), фельдшер-акушерлык пункты бар.

Клуб каршында “Йолдыз” хореография коллективы, “Балкыш” театр коллективы (икесе дә 2013 елдан) эшли.

Г.В.Вәҗетдинов (1907–1940) – кече лейтенант, Советлар Союзы Герое, 1990 елда туган авылында аның бюсты куелган; Татар Бүләре авылы мәктәп бинасында (ул шул мәктәпне тәмамлый) мемориаль такта урнаштырылган.

1816 елда – 170,
1834 елда – 254 ир-ат;
1870 елда – 754,
1897 елда – 1068,
1920 елда – 1314,
1926 елда – 765,
1938 елда – 797,
1949 елда – 542,
1958 елда – 444,
1970 елда – 472,
1979 елда – 400,
1989 елда – 276,
2002 елда – 235,
2010 елда – 207,
2017 елда – 179 кеше (татарлар).