Урманчы

XVII йөзнең икенче яртысыннан мәгълүм. Революциягә кадәрге чыганакларда шулай ук Троицкий, Көек, Бөрсет-Кыерлы, Түбәнавыл исемнәре белән дә мәгълүм.

XVIII йөз – XIX йөзнең беренче яртысында халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек.

XX йөз башында авылда Троица чиркәве (1818–1825 елларда А.И.Сухопаров акчасына төзелә; классицизм стилендә дини архитектура истәлеге), земство мәктәбе (1868 елда ачыла), 2 тимерче алачыгы, тегермән, казна шәраб һәм 3 вак-төякләр кибете эшли.

Авыл җәмәгатенең имана җире 1203,8 дисәтинә тәшкил итә.

1920 елга кадәр Казан губернасының Мамадыш өязе Түбән Сон волостена керә. 1920 елдан ТАССРның Мамадыш кантонында. 1930 елның 10 августыннан – Мамадыш, 1935 елның 10 февраленнән – Кызыл Йолдыз, 1959 елның 26 мартыннан Мамадыш районында.

Хәзер Урманчы авыл җирлеге составында.

1925 елда – авылда “Новй путь” хезмәт игенчелек артеле, 1931 елда “Заря” колхозы оештырыла. Халкы сөт терлекчелек белән шөгыльләнә.

Авылда мәдәният йорты, фельдшер-акушерлык пункты (2014 елдан) эшли. Төзекләндерелгән “Тегермән суы” чишмәсе бар (2017 ел).

А.И.Петров (1933 елда туган) – химик‑технолог, химия фәннәре докторы, профессор, ТР ның атказанган фән эшлеклесе.

1782 елда – 85 ир-ат;
1859 елда – 559,
1897 елда – 862,
1908 елда – 860,
1920 елда – 900,
1926 елда – 892,
1938 елда – 827,
1970 елда – 695,
1979 елда – 441,
1989 елда – 345,
2002 елда – 265,
2010 елда – 236,
2017 елда – 191 кеше (керәшен татарлар – 93%, руслар – 6%).