Түбән Әрнәш

XVII йөзнең икенче яртысында нигез салына. Революциягә кадәрге чыганакларда хәзерге исеме белән билгеле.

XVIII йөз – XIX йөзнең беренче яртысында халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек.

XX йөз башында авылда су тегермәне, вак-төякләр кибете эшли. Авыл җәмәгатенең имана җире 558 дисәтинә тәшкил итә.

1920 елга кадәр Казан губернасының Мамадыш өязе Шомырбаш волостена керә. 1920 елдан ТАССРның Мамадыш кантонында. 1930 елның 10 августыннан – Мамадыш, 1935 елның 10 февраленнән – Кызыл Йолдыз, 1959 елның 26 мартыннан Мамадыш районында.

Хәзер Албай авыл җирлеге составында.

Халкы кырчылык белән шөгыльләнә.

2016 елда “Югары оч”, “Түбән оч” чишмәләре төзекләндерелә.

П.В.Владимиров (1904–?) – хакимият-хуҗалык эшлеклесе, ТАССР ның урман сәнәгате министры (1948–1955 елларда).

1782 елда – 62 ир-ат;
1859 елда – 256,
1897 елда – 571,
1908 елда – 634,
1920 елда – 545,
1926 елда – 490,
1938 елда – 427,
1949 елда – 237,
1958 елда – 221,
1970 елда – 196,
1979 елда – 117,
1989 елда – 61,
2002 елда – 35,
2010 елда – 23,
2017 елда – 18 кеше (керәшен татарлар).