Түбән Оча

1710–1711 еллардан мәгълүм. XVIII йөз – XIX йөзнең беренче яртысында халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек.

XX йөз башында авылда Казан Богородица чиркәве, Изге Гурий борадәрлеге мәктәбе (1876 елда ачыла), су тегермәне, вак-төякләр кибете эшли.

Бу чорда авыл җәмәгатенең имана җире 699,8 дисәтинә тәшкил итә.

1920 елга кадәр Казан губернасының Мамадыш өязе Петропавел волостена керә. 1920 елдан ТАССРның Мамадыш кантонында. 1930 елның 10 августыннан – Тәкәнеш, 1932 елның 1 гыйнварыннан – Мамадыш, 1935 елның 10 февраленнән – Тәкәнеш, 1963 елның 1 февраленнән Мамадыш районында.

Хәзер Түбән Тәкәнеш авыл җирлеге составында.

Авылда “Тәкәнеш” агросәнәгать комплексы” җаваплылыгы чикләнгән җәмгыяте (терлекчелек, үсемлекчелек, терлек азыгы җитештерү) эшли.

Халкы кырчылык, ит-сөт терлекчелеге, умартачылык белән шөгыльләнә.

Элегрәк авылда башлангыч мәктәп эшли. Хәзер китапханә (1993 елдан), клуб бар.

1782 елда — 36 ир-ат;
1859 елда — 206,
1897 елда — 388,
1908 елда — 474,
1920 елда — 460,
1926 елда — 511,
1949 елда — 287,
1958 елда — 304,
1970 елда — 376,
1979 елда — 335,
1989 елда — 246,
2002 елда — 257,
2010 елда — 223,
2017 елда — 195 кеше (удмуртлар – 98%, башка милләтләр – 2%).