Зәй-Чишмә

Авылга XVIII йөзнең беренче яртысында нигез салына.

1860 елларга кадәр халкы алпавыт крәстияннәре катлавына керә (алпавыт Левашёвлар карамагында). Бу чорда халкының төп шөгыле – игенчелек һәм терлекчелек, балык тоту, мичкә һәм көпчәк ясау кәсепчелеге таралган була. XVIII йөздән авыл янында бакыр рудасы чыганагы эшкәртелә башлый.

XX йөз башында земство мәктәбе (1901 елда), 3 бакалея, икмәк саклау һәм сату кибетләре, су тегермәне эшли. Авыл Рус Акташы авылы приходына карый.

Бу чорда авыл җәмәгатенең имана җире 1823,1 дисәтинә тәшкил итә.

1920 елга кадәр авыл Уфа губернасының Минзәлә өязе Акташ волостена керә. 1920 елдан – ТАССРның Минзәлә, 1922 елдан Чаллы кантоны составында. 1930 елның 10 августыннан – Акташ, 1959 елның 26 мартыннан Әлмәт районында.

Хәзер Бирге Ямаш авыл җирлеге составына керә.

1930 елда авылда “Дружина” колхозы оештырыла (беренче рәисе – Кустов). 1957 елда “Акташ” совхозы белән берләшә.

Халкы кырчылык, сөт терлекчелеге белән шөгыльләнә.

Авыл янында археология истәлекләре табыла: Зәй-Чишмә авыллыгы (Имәнкискә культурасы), II, III Зәй-Чишмә авыллыгы (Имәнкискә культурасы).

1782 елда – 33 ир заты;
1816 елда – 162,
1859 елда – 278,
1870 елда – 340,
1897 елда – 561,
1920 елда – 711,
1926 елда – 652,
1938 елда – 632,
1949 елда – 392,
1958 елда – 554,
1970 елда – 541,
1979 елда – 413,
1989 елда – 288,
2002 елда – 262,
2010 елда – 279,
2015 елда – 290 кеше (руслар).