Сходнево-Чертанла

XIX йөз башында нигез салына. Революциягә кадәрге чыганакларда Түбән Чертанла исеме белән билгеле.

1860 елларга кадәр халкы дәүләт крәстияннәре катлавына керә. Бу чорда халкының төп шөгыле – игенчелек, терлекчелек.

XX йөз башында миссионерлык мәктәбе эшли. Авыл җәмәгатенең имана җире 1318 дисәтинә тәшкил итә.

1920 елга кадәр Самара губернасының Бөгелмә өязе Каратай волостена керә. 1920 елдан ТАССРның Бөгелмә кантонында. 1930 елның 10 августыннан – Әлмәт, 1935 елның 10 февраленнән – Яңа Писмән, 1955 елның 18 августыннан Лениногорск районында.

Хәзер Куакбаш авыл җирлеге составында.

1930 елларда авылда “Канаш” колхозы оештырыла, 1960 елдан К.Маркс исемендәге колхоз (үзәк утары – Куакбаш авылы) составында, 1994 елдан – К.Маркс исемендәге күмәк предприятие, 2006 елдан – “Маркс” җаваплылыгы чикләнгән җәмгыяте.

Халкы кырчылык, сөт терлекчелеге белән шөгыльләнә.

2016 елда Изге Троица чишмәсе янында су коену урыны ачыла.

Авылда Ә.М.Хәйретдиновка бюст куелган.

Е.Г.Яковлев (1914–1945) – өлкән лейтенант, Советлар Союзы Герое, Ленин, Кызыл Байрак, 1 нче дәрәҗә Ватан сугышы, Кызыл Йолдыз орденнары кавалеры, Лениногорск шәһәрендә бер урам аның исеме белән атала, туган авылында бюсты куелган.

1859 елда – 256,
1889 елда – 336,
1910 елда – 364,
1920 елда – 494,
1926 елда – 479,
1938 елда – 460,
1949 елда – 455,
1958 елда – 474,
1970 елда – 439,
1979 елда – 231,
1989 елда – 136,
2002 елда – 84,
2010 елда – 57,
2017 елда – 52 кеше (чуашлар).