Травкино

XVII йөз ахырында нигез салына. 1861 елгы реформага кадәр халкы алпавыт крәстияннәре катлавына керә. 1770 елда гвардия сержанты П.Н.Белавин (Мәскәүдә яши) милкендә 44 ир-ат исәпләнә. 1861 елда авыл алпавыт Селезнёв һәм статский советник С.С.Могилатов карамагында була. Бу чорда халкының төп шөгыле – игенчелек һәм терлекчелек.

XX йөз башында авылда вак-төякләр кибете эшли. Авыл җәмәгатенең имана җире 390,5 дисәтинә тәшкил итә.

1920 елга кадәр Казан губернасының Лаеш өязе Астраханка волостена керә. 1920 елдан ТАССРның Лаеш кантонында. 1927 елның 14 февраленнән – Воскресенский, 1927 елның 1 августыннан – Казан авыл районында, 1938 елның 4 августыннан – Столбище, 1959 елның 26 мартыннан – Лаеш, 1963 елның 1 февраленнән – Питрәч, 1965 елның 12 гыйнварыннан Лаеш районында.

Хәзер Хәерби авыл җирлеге составында.

1932 елда авылда “Победитель” колхозы оештырыла, 1950 елда – авыл “Комсомолец” колхозы (үзәк утары юкка чыккан Чемерцы авылында була), 1960 елда – “Столбище” совхозы составына керә. Хәзер фермер хуҗалыгы эшли (ат, ишәк, качыр, дөяләр үрчетелә).

Авыл янында Куст, Саф (ТРның табигать истәлеге), Чардаклы күлләре бар.

1782 елда – 44 ир-ат;
1859 елда – 76,
1897 елда – 185,
1908 елда – 187,
1920 елда – 237,
1926 елда – 255,
1949 елда – 194,
1958 елда – 203,
1970 елда – 150,
1979 елда – 69,
1989 елда – 35,
2002 елда – 20,
2010 елда – 11,
2017 елда – 13 кеше (руслар, татарлар).