Яңа Кумор

1873 елда Югары Кумор авылыннан күченүчеләр тарафыннан нигез салына. Бу чорда халкының төп шөгыле – игенчелек һәм терлекчелек, шулай ук йон тетү кәсепчелеге тарала.

XX йөз башында авылда вак-төякләр кибете, изге Гурий борадәрлеге мәктәбе (1903 елда ачыла) эшли.

Авыл җәмәгатенең имана җире 87,2 дисәтинә тәшкил итә.

1920 елга кадәр Казан губернасының Мамадыш өязе Иске Юмья волостена керә. 1920 елдан ТАССРның Мамадыш кантонында. 1930 елның 10 августыннан – Кукмара, 1963 елның 1 февраленнән – Саба, 1965 елның 12 гыйнварыннан Кукмара районында.

Хәзер Оштырма-Юмья авыл җирлеге составында.

1931 елда “Выль улон” колхозы оештырыла (беренче рәисе – Г.Анисимов), 1952 елдан – Калинин исемендәге колхоз (Оштырма-Юмья авылы), 1965 елдан – “Заря” колхозы (Оштырма-Юмья авылы) (1993 елдан – “Заря” күмәк авыл хуҗалыгы предприятиесе, 2003 елдан – “Заря” авыл хуҗалыгы җитештерү кооперативы), 2009 елдан – “Әсәнбаш” җаваплылыгы чикләнгән җәмгыяте (“Заря” бүлеге), 2014 елдан – “Сөт иле – Әсәнбаш”филиалы, 2017 елдан “Әсәнбаш-Агро” җаваплылыгы чикләнгән җәмгыяте составында.

Халкы ит терлекчелеге һәм кырчылык белән шөгыльләнә.

2012 елга кадәр авылда башлангыч мәктәп эшли. Клуб (1962 елдан) бар.

1859 елда – 37,
1897 елда – 78,
1908 елда – 106,
1920 елда – 120,
1926 елда – 119,
1938 елда – 163,
1949 елда – 153,
1958 елда – 132,
1970 елда – 175,
1979 елда – 161,
1989 елда – 131,
2002 елда – 158,
2010 елда – 156,
2017 елда – 155 кеше (удмуртлар – 76%, татарлар – 23%).