Киндеркүл

XVII йөздә нигез салына. Революциягә кадәрге чыганакларда Кадракол исеме белән телгә алына.

XVIII йөз – XIX йөзнең беренче яртысында халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек.

1859 елгы мәгълүматлар буенча, авылда мәчет була.

XX йөз башында авылда мәчет, мәктәп, тегермән, ярма яргыч, 2 вак-төякләр кибете эшли. Авыл җәмәгатенең имана җире 734,8 дисәтинә тәшкил итә.

1920 елга кадәр Казан губернасының Мамадыш өязе Әсән-Елга волостена керә. 1920 елдан ТАССРның Мамадыш кантонында. 1930 елның 10 августыннан – Кукмара, 1963 елның 1 февраленнән – Саба, 1965 елның 12 гыйнварыннан Кукмара районында.

Хәзер Манзарас авыл җирлеге составында.

1930 елда авылда “Беренче май” колхозы (1949 елдан үзәк утары Манзарас авылында) оештырыла, 1959 елдан – Муса Җәлил исемендәге колхоз (Манзарас авылы), 1963 елдан – “Правда” колхозы (Манзарас авылы) (1994 елдан – “Правда” күмәк-өлешле авыл хуҗалыгы җитештерү предприятиесе, 2001 елдан – “Правда” авыл хуҗалыгы җитештерү кооперативы, 2006 елдан – “Правда” җаваплылыгы чикләнгән җәмгыяте), 2016 елдан – “Урал” җаваплылыгы чикләнгән җәмгыяте составында.

Халкы кырчылык, сөт терлекчелеге, умартачылык белән шөгыльләнә.

2017 елга кадәр башлангыч мәктәп эшли.

Авылда балалар бакчасы (1989 елдан), мәчет (1910 елдан), хоккей мәйданчыгы һәм төзекләндерелгән пляж ( икесе дә – 2017 елдан) бар.

Авыл тирәсендә археология истәлеге – Киндеркүл туктаулыгы (бронза гасыры) ачыклана.

Зират территориясендә XIX йөзгә нисбәтле гарәп графикасы белән язылган 2 кабер ташы табыла.

1782 елда – 53 ир-ат;
1859 елда – 273,
1897 елда – 375,
1908 елда – 429,
1920 елда – 417,
1926 елда – 388,
1938 елда – 341,
1949 елда – 232,
1958 елда – 224,
1970 елда – 253,
1979 елда – 235,
1989 елда – 205,
2002 елда – 329,
2010 елда – 398,
2017 елда – 445 кеше (татарлар).