Морза Бәрлебашы

XVIII йөздә нигез салына.

1860 елларга кадәр халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек.

XX йөз башында авылда мәчет, мәктәп, 2 вак-төякләр кибете эшли. Авыл җәмәгатенең имана җире 301 дисәтинә тәшкил итә.

1920 елга кадәр Казан губернасының Зөя өязе Кошман волостена керә. 1920 елдан ТАССРның Зөя кантонында. 1927 елның 14 февраленнән – Ульянково, 1927 елның 1 августыннан – Кайбыч, 1963 елның 1 февраленнән – Буа, 1964 елның 4 мартыннан – Апас, 1991 елның 19 апреленнән Кайбыч районында.

Хәзер Ябалак авыл җирлеге составында.

1930 елларда авылда “Яңа тормыш” колхозы оештырыла. 1950 елда “Просвещение” колхозы (Бәрлебашы авылы) белән берләштерелә. 1957 елда – “Дружба” колхозы, 1961 елда Ильич исемендәге колхоз итеп үзгәртелә, 1993 елдан – “Бәрле” крәстиян хуҗалыклары ассоциациясе, 2003 елдан – “Ак Барс Кайбыч” агрофирмасы” җаваплылыгы чикләнгән җәмгыяте.

Халкы күбесенчә кырчылык, сөт терлекчелеге, чөгендер үстерү белән шөгыльләнә.

1935–2012 елларда авылда башлангыч мәктәп эшли. Авылда төзекләндерелгән чишмә бар.

1859 елда – 199,
1897 елда – 342,
1908 елда – 409,
1920 елда – 361,
1926 елда – 316,
1938 елда – 365,
1949 елда – 314,
1958 елда – 284,
1970 елда – 232,
1979 елда – 211,
1989 елда – 226,
2002 елда – 209,
2010 елда – 157,
2017 елда – 156 кеше (татарлар).