Хуҗа Хәсән

1619 елдан мәгълүм. XVIII йөз – XIX йөзнең беренче яртысында халкы дәүләт крәстияннәре катлавына керә. Бу чорда халкының төп шөгыле – игенчелек, терлекчелек һәм он тарту кәсепчелеге тарала.

XX йөз башында авылда земство мәктәбе (1871 елда Изге Гурий борадәрлеге мәктәбе буларак ачыла), 2 тегермән, тимерче алачыгы, 4 ярма яргыч,  вак-төякләр кибете эшли.

Авыл җәмәгатенең имана җире 1544,1 дисәтинә тәшкил итә.

1920 елга кадәр Казан губернасының Цивиль өязе Иске Тәрбит волостена керә. 1920 елдан Чуаш автономияле өлкәсе составында, 1921 елдан – ТАССРның  Буа, 1922 елдан Зөя кантонында. 1927 елның 14 февраленнән – Ульянково, 1927 елның 1 августыннан – Кайбыч, 1944 елның 19 февраленнән – Подберезье, 1956 елның 17 маеннан – Кайбыч, 1963 елның 1 февраленнән – Буа, 1964 елның 4 мартыннан – Апас, 1991 елның 19 апреленнән Кайбыч районында.

Хәзер Хуҗа Хәсән авыл җирлеге үзәге.

1929 елда – авылда “Ключи Октября” колхозы (беренче рәисе – Д.Т.Боярин), 1931 елда “Хуҗахәсән” колхозы (беренче рәисе – А.Т.Грановский) оештырыла, 1946 елда алар Киров исемендәге колхозга берләштерелә, 1950 елда авыл берләштерелгән Киров исемендәге колхоз (Александровка поселогы, Кушкүл авылы) составына керә. 1994 елдан – Киров исемендәге крәстиян  хуҗалыклары ассоциациясе, 2004 елдан – “Гөбенә” агрофирмасы” җаваплылыгы чикләнгән җәмгыяте.

Халкы күбесенчә кырчылык, сөт терлекчелеге белән шөгыльләнә.

1926 елда авылда башлангыч мәктәп ачыла, 1948 елда – җидееллык, 1962 елда – тулы булмаган урта, 1989 елда урта мәктәп (1970 һәм 2001 елларда яңа бина төзелә) итеп үзгәртелә.

1998 елдан мәктәптә төбәк тарихын өйрәнү музее (оештыручысы – Л.И.Константинова) эшли.

Авылда мәдәният йорты (1930 елдан), китапханә (1921 елдан), балалар бакчасы (1991 елдан), фельдшер-акушерлык пункты (1940 елдан), универсаль спорт мәйданчыгы (2014 елдан) бар.

Мәдәният йорты каршында  “Инешкәй” фольклор ансамбле (2016 елдан) эшли.

Авыл янында төзекләндерелгән “Кыр кизләве” чишмәсе бар.

В.В.Данилов (1937 елда туган) – ТРның атказанган икътисадчысы, төбәк тарихын өйрәнүче, туган авылы турында китаплар авторы;

И.К.Капитонов (1965 елда туган) – рәссам, РФ Рәссамнар берлеге әгъзасы.

1747 елда – 121,
1782 елда – 123 ир-ат;
1859 елда – 571,
1897 елда – 823,
1908 елда – 1334,
1920 елда – 1354,
1926 елда – 1350,
1938 елда – 1314,
1949 елда – 1090,
1958 елда – 1036,
1970 елда – 1002,
1979 елда – 939,
1989 елда – 742,
2002 елда – 668,
2010 елда – 635,
2017 елда – 647 кеше (татарлар – 94%, чуашлар – 4%, руслар – 1%).