Александровка

1930 елларда Галактионов исемендәге совхоз поселогы буларак нигезләнә, 2001 елдан хәзерге исемдә.

Нигезләнгән вакыттан Чистай районына керә. Хәзер Галактионово-совхоз авыл җирлеге үзәге.

1919 елда княгиня А.П.Ливенның элекке экономиясе җирлегендә «Александровка хуторы» хуҗалыгы оештырыла. 1924 елдан – Галактионов исемендәге совхоз (1927 елга кадәр В.Н.Родин җитәкчелек итә). Хуҗалык алдынгы була; 1921 елда нәселле сарыклар үрчетү фермасы төзелә, Германиядән терлекләр сатып алына, 1928 елда мөгезле эре терлек фермасы булдырыла. 1924 елда Змеево селекция станциясе карамагына тапшырылганнан соң, ул республика хуҗалыкларын бөртекле-кузаклы һәм башка культураларның сортлы орлыклары белән тәэмин итә башлый. 1943 елдан – Кама елга пароходчылыгының Хезмәт тәэминаты идарәсе карамагында. Сугыштан соңгы чорда кошчылык фабрикасы төзелә (1968), актив рәвештә башка хуҗалык һәм социаль тармаклар объектлары төзелешләре җәелдерелә.

1994 елдан авылда – Галактионов исемендәге авыл хуҗалыгы коммуналь унитар предприятиесе, 1997 елдан шул ук исемдәге авыл хуҗалыгы җитештерү предприятиесе, 2012 елдан – «Җүкәтау» җаваплылыгы чикләнгән җәмгыяте бүлекчәсе, 2017 елдан «Чистопольская» агрофирмасы» җаваплылыгы чикләнгән җәмгыяте эшли.

Халкы башлыча үсемлекчелек һәм сөт терлекчелеге белән шөгыльләнә.

1924 елда башлангыч мәктәп ачыла, 1936 елда – җидееллык, соңрак – сигезьеллык, 1983 елда – урта (яңа бина төзелә), 2015 елда тулы булмаган урта мәктәп итеп үзгәртелә.

Авылда мәдәният йорты (1975 елдан, 1950 елдан клуб эшли), китапханә (1971 елдан, 1947 елда уку өе буларак ачыла; 1975 елдан – мәдәният йорты бинасында), балалар бакчасы (1950 елдан, 1970 елда яңа бина төзелә, 2020 елдан – мәктәп бинасында), фельдшер-акушерлык пункты (2013 елдан, 1950 елда медпункт буларак нигезләнә).

1938 елда – 578,
1949 елда – 607,
1958 елда – 702,
1970 елда – 954,
1979 елда – 926,
1989 елда – 843,
2002 елда – 794,
2010 елда – 639,
2021 елда – 535 кеше (руслар – 91%, татарлар – 7%).