Югары Кармалка

XVIII йөзнең беренче яртысында нигезләнә. 1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында чиркәү (совет чорында җимерелә), чиркәү-приход мәктәбе эшли; 6–12 декабрьдә ярминкә үткәрелә. Авыл җәмәгатенең имана җире 3227 дисәтинә тәшкил итә.

1920 елга кадәр авыл Самара губернасының Бөгелмә өязе Югары Кармалка волосте үзәге. 1920 елдан – ТАССРның Бөгелмә кантонында. 1930 елның 10 августыннан – Беренче Май, 1963 елның 1 февраленнән – Лениногорск, 1965 елның 12 гыйнварыннан – Чирмешән районында.

Хәзер – Түбән Кармалка авыл җирлегендә.

1930 елда авылда “Новая жизнь” колхозы оештырыла. 1959 елдан эреләндерелгән “Победа” колхозы (үзәк утары – Түбән Кармалка авылы), 1994 елдан “Победа” авыл хуҗалыгы җитештерү кооперативы эшли. 2016 елдан “Био-Агро” җаваплылыгы чикләнгән җәмгыяте.

Халкы башлыча үсемлекчелек, сөт терлекчелеге белән шөгыльләнә.

1930 елда авылда башлангыч мәктәп ачыла, 1962 елда – сигезьеллык, 1986 елда – тулы булмаган урта мәктәп (яңа бина төзелә) итеп үзгәртелә. 1986–2016 елларда “Ручеек” балалар бакчасы була.

Клуб (2017 елда яңа бина салына), фельдшер-акушерлык пункты, шулай ук авыл янында төзекләндерелгән “Кармалка”чишмәсе бар.

Клуб каршында “Сударушка” фольклор ансамбле эшли.

1859 елда – 350,
1897 елда – 1065,
1920 елда – 1235,
1926 елда – 917,
1949 елда – 639,
1958 елда – 505,
1970 елда – 450,
1989 елда – 280,
2002 елда – 239,
2010 елда – 212,
2020 елда – 166 кеше (руслар – 59%, татарлар – 21%, чувашлар – 8%).