Чуаш Афонькәсе

1730 елларда нигезләнә. Ишлинка исеме белән дә искә алына.

1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында су тегермәне эшли. Авыл җәмәгатенең имана җире 1061 дисәтинә тәшкил итә.

1920 елга кадәр авыл Самара губернасының Бөгелмә өязе Мордва Афонькәсе волостена керә. 1920 елдан – ТАССРның Бөгелмә кантонында. 1930 елның 10 августыннан – Беренче Май, 1963 елның 1 февраленнән – Лениногорск, 1965 елның 12 гыйнварыннан – Чирмешән районында.

Хәзер – Мордва Афонькәсе авыл җирлегендә.

1930 елларда авылда “Ишлинка” колхозы оештырыла. 1950 елда “Путь к коммунизму” колхозына (үзәк утары – Мордва Афонькәсе авылы) кушыла, 1959 елдан “Новый путь” колхозында (үзәк утары – Лагерка авылы), 2002 елдан “Новый путь” күмәк предприятиесе эшли. 2009 елдан “Лагерка” җаваплылыгы чикләнгән җәмгыяте.

Халкы башлыча үсемлекчелек, сөт терлекчелек белән шөгыльләнә.

1859 елда – 293,
1889 елда – 373,
1910 елда – 382,
1920 елда – 405,
1926 елда – 175,
1949 елда – 207,
1958 елда – 208,
1970 елда – 201,
1979 елда – 163,
1989 елда – 126,
2002 елда – 89,
2010 елда – 66,
2020 елда – 59 кеше (чувашлар).