Мавровская Магдалина Константиновна

1914 елның 23 феврале, хәзер Свердловск өлкәсенең Каменский районы Маминское авылы – 2012 елның 24 мае, Казан.

1934 елда Татарстан сынлы сәнгать техникумын (хәзер Казан сынлы сәнгать училищесе) тәмамлый.

Рәссамнар берлеге әгъзасы (1986).

М.Мавровская иҗаты күпкырлы. Аның әсәрләре арасында – пейзажлар, портретлар, натюрмортлар, шулай ук акварель, рәсем, эстамп (офорт, литография, монотипия) техникаларындагы жанр композицияләре.

1940–1950 елларда М.Мавровская рәсемнәренең графика серияләрендә станлы циклларының китап иллюстрацияләренә якынлыгы тоемлана: «Шагыйрь Тукайның балачагы» (1947, карандаш), «Пушкин Казан Кремлендә» (1950, төсле карандаш), М.Горькийның «Минем университетларым» әсәренә (1946–1947, карандаш, күмер), «М.Горький әсәрләрендә татарлар образы» (1958–1959, кара акварель; 1962 елда акватинта белән офорт техникасында башкара) иллюстрацияләр циклы.

1977–1979 елларда Казанда М.Мавровская тырышлыгы белән ТАССР Сәнгать фонды каршында офорт остаханәсе оештырыла. 1970 еллар башында, рәссам-график буларак, М.Мавровская иҗатының үзенчәлеген офорт билгели, әлеге стильдә «Кокушкино авылы – В.И.Ульянов-Ленинның беренче сөрген урыны» (1967–1968), «Болгарлар» (1968–1969), «Казанда Горький урыннары» (1976–1979), «Казан Кремле манаралары» (1976–1978), «Якын үткәндәге Казан», «Борынгы Казан» (икесе дә – 1987–1989) әсәрләре иҗат ителә. Казанның йөзен саклап калу теләге башкала турында офорт серияләре иҗат итүгә этәрә.

Республика (1942 елдан) һәм зона – «Зур Идел» (Волгоград, 1967; Ульянов, 1969) күргәзмәләрендә катнаша.

Шәхси күргәзмәләре 1981 (Казан), 1982 (Казан янындагы Васильево поселогы), 1984, 1994, 2001, 2004 (Казан) елларда уза.

Черкасова Н.В.Изобразительное искусство Советского Татарстана. Казань, 1957.

Червонная С.М.Художники Советской Татарии. Казань, 1984.

Ильина М.Е. Шесть десятилетий вдохновенного труда // Казань. 1998. № 4.

Магдалина Мавровская. Графика: каталог выставки. Казань, 2001.

Автор – О.Г.Вербина