Йосыф китабы

Күп сандагы кулъязма һәм китап вариантлары бар.

Телдән-телгә күчеп, шулай ук күп тапкырлар күчереп яза торгач, төп нөсхә үзгәрешләр кичерә: күләме кыскара, сюжеты гадиләшә. Йосыф һәм Зөләйха мәхәббәтен, Йосыфның үтә диндарлыгын, аның чиксез сабыр булуын һәм Аллаһ алдында баш июен, әтисе Йагъкубның газиз улы белән аерылу хәсрәтеннән туган рухи газапларын яктырткан эпизодлар күбрәк тарала.

Поэманың аерым эпизодлары, кайбер аеруча мәгънәле, тәэсирле сюжет сызыклары мөстәкыйль әсәр сыйфатында яши.

«Йосыф китабы»ның 39 кулъязма һәм сөйләм варианты теркәлгән: 29 – ТР районнарында; 4 – Омск өлкәсендә; 2 – Чиләбе, 1 әр данә – Горький, Төмән, Иркутск өлкәләрендә һәм Чуаш республикасында. Алар барысы да «Татар халык иҗаты» җыентыгына кергән.

Хисамов Н. «Кыйссаи Йосыф» поэмасының халыкта яшәеше // Казан утлары. 1974. № 9;

шул ук. «Кыйссаи Йосыф» поэмасында әдәбият-фольклор бәйләнешләрен өйрәнүгә карата // Татар теле һәм әдәбияты. К., 1977. 6 кит.;

Кыйссаи Йосыф: Йосыф турында дастан. К., 1983.

Автор — Ф.И.Урманчеев