Эрбет ярминкәсе

Эрбет шәһәрендә (хәзер Свердловск өлкәсе) уздырыла. XVII йөзнең 2 нче чирегендә барлыкка килә. XVII–XVIII йөзләрдә гыйнварда, XIX йөздә — XX йөз башында февральдән алып мартка кадәр үткәрелә.

Руслар һәм татарлардан тыш, Кытай, Урта Азия сәүдәгәрләре дә катнаша. Җәнлек тиреләре, тукымалар, күн эшләнмәләр, чәй, бал, балавыз, колмак, шулай ук металл эшләнмәләр, галантерия әйберләре, азрак күләмдә — бакалея һәм азык-төлек товарлары сатыла. Россия империясендә товар алмашу буенча Түбән Новгород ярминкәсеннән кала икенче: 1880 елларда ярминкәнең товар әйләнеше 68 млн сум тәшкил итә.

Транссебер тимер юлыннан читтәрәк булуы сәбәпле, акрынлап әһәмиятен югалта.

Хитров А. К истории г. Ирбита и Ирбитской ярмарки. Ирбит, 1872; 

Александров В.А. Начало Ирбитской ярмарки // История СССР. 1974. № 6.