Солтанов Закир

1923 елның 29 июне, хәзер Удмурт Республикасының Кече Пурга районы Әбделмән авылы — 1983 елның 6 апреле, Украина ССР, Херсон шәһәре.

Фабрика-завод өйрәнчекләре мәктәбен (1940), Эчке эшләр министрлыгының Куйбышев офицерлар составы мәктәбен (1947) тәмамлый.

Ижевск машина төзелеше заводында слесарь булып эшли.

1942 елның ноябреннән Кызыл Армиядә. 1943 елның гыйнварыннан Бөек Ватан сугышында, 498 нче укчы полкның (47 нче армиянең 132 нче укчы дивизиясе) танкка ата торган мылтык взводы командиры. 1 нче Украина, 2 нче Белоруссия һәм 1 нче Белоруссия фронтлары составында Сулъяк яр Украинаны азат итүдә (1943), Люблин-Брест (1944) һәм Көнчыгыш Померания (1945) һөҗүм операцияләрендә катнаша. Яблонно-Легионово шәһәреннән (хәзер Легьоново шәһәре, Польша) төньяктарак булган сугышларда батырлык күрсәтә: 1945 елның 15 гыйнварында Закир Солтанов җитәкчелегендәге взвод дошманның оборона сызыгын өзүдә катнаша, Чонсткув торак пункты янында Висла елгасын кичеп чыга һәм батальон килеп җиткәнче позицияне үз кулында тота.

1947–1953 елларда Свердловск шәһәрендә һәм Свердловск өлкәсендә оператив вәкил булып эшли. 1953 елдан запаста, Херсон шәһәрендә яши.

Ленин ордены, медальләр белән бүләкләнә.

Батырлар китабы — Книга Героев. Казань, 2000.

Автор — М.З.Хәбибуллин