1904 елның 21 марты, Казан губернасы, Тәтеш өязе Чинчурино авылы — 1955 елның 17 августы, шунда ук җирләнә.

1926–1928 елларда Кызыл Армия сафларында.

Әстерхан укыту-төзелеш техникумын тәмамлаганнан соң, Әстерхан шәһәре оешмаларында, Идел-Нократ урман хуҗалыгында, «Промстрой» трестында, суднолар верфендә техник-төзүче, «Плодкультур» совхозында прораб булып эшли.

1941 елда яңадан Кызыл Армиягә мобилизацияләнә.

Кече лейтенантлар курсларын тәмамлый (1942).

1941 елның августыннан Бөек Ватан сугышы фронтларында, 2 нче Украина фронтының 60 нчы армиясендә 1 нче гвардия артиллерия дивизиясе 3 нче гвардия җиңел артиллерия бригадасының 200 нче гвардия җиңел артиллерия полкында идарә взводы командиры. Воронеж, Үзәк һәм 1 нче Украина фронтлары гаскәрләре составында Воронеж шәһәреннән төньяктарак Дон елгасының сулъяк ярындагы оборона сугышларында (1942), Украинаның Сулъяк ярын азат иткәндә (1943), Сандомир-Силезия һөҗүм операцияләрендә катнаша (1945).

Шәһәр тибындагы Дымер (Украина ССР, Киев өлкәсенең Киев-Святошино районы) поселогы янында Днепр елгасын кичкәндә батырлык күрсәтә. 1943 елның 1 октябрендә беренчеләрдән булып елганы кичә, үзенең батареясы белән элемтә урнаштыра һәм дошманның яр буе ныгытмаларын утка тотканда төзәтмәләр кертә. 1 октябрьдән 10 октябрьгә кадәр аның мәгълүматлары буенча дошман танклары һәм пехота төркемнәре, дүрт миномет батареясы, 9 пулемет ноктасы, дүрт күзәтү пункты юк ителә.

Сугыштан соң — запаста, Әстерхан шәһәрендә яши. Ленин районы рәисе урынбасары, төзелеш начальнигы, елга балык порты мастеры булып эшли.

Ленин ордены, 1 нче дәрәҗә Ватан сугышы ордены, медальләр белән бүләкләнә.

Герой бюсты Тәтеш шәһәренең Дан мемориалы территориясендә урнаштырыла. Әстерхан шәһәре һәм Чинчурино авылы урамнарына аның исеме бирелә.

Батырлар китабы – Книга Героев. Казань, 2000;

Книга Героев = Батырлар китабы / сост.: М.В.Черепанов, Е.В.Панов. Казань, 2022. С. 151;

Населённые пункты Республики Татарстан: иллюстрированная энциклопедия: в 3 т. Казань, 2023. Т. 3. С. 447, 500–501.

Авторлар — М.З.Хәбибуллин, Л.М.Айнетдинова, Г.Х.Галимуллина