Самороднов Матвей Михайлович

1927 елның 18 августы, Чистай кантоны Берёзовая Грива авылы – 2010 елның 21 июне, Алексеевск районы Алексеевск шәһәр тибындагы поселогы.

Тәтеш авыл хуҗалыгы техникумын тәмамлый (1967).

1940–1983 елларда Алексеевск районында: «Заветы Ленина» колхозында тракторчы (1943 елдан), клуб мөдире (1953 елдан), бригадир (1956 елдан), «Левашовский» (1963 елдан), «Лебединский» (1968) совхозларында бүлек управляющие; «Родина» колхозы рәисе (1968 елдан), «Красный Восток» совхозы директоры (1972–1983).

М.М.Самороднов ике хуҗалыкның да үсешенә өлеш кертә. 1972 елда «Родина» колхозында бөртекле культураларның уңышы 1 га дан 20,9 ц га, еллык савым һәр сыердан уртача 2932 кг га җитә. «Красный Восток» совхозында М.М.Самороднов җитәкче булганда бөртекле культураларның уңышы 1 га дан 6,5 ц га, еллык савым һәр сыердан 243 кг га арта; 460 баш мөгезле эре терлек өчен бина, 3000 баш дуңгыз өчен ферма, 6838 кв.м торак йорт төзелә.

Октябрь Революциясе ордены, ике Хезмәт Кызыл Байрагы ордены, медальләр белән бүләкләнә.