Просвирнин Михаил Андреевич

1912 елның 20 сентябре (башка мәгълүматлар буенча 1912 елның 26 июле), Казан губернасы Мамадыш өязе Сокольи Горы авылы, хәзер Мамадыш районы Соколка авылы — 1973 елның 5 сентябре, шунда ук.

Башлангыч мәктәпне тәмамлый, колхозда, Казанда «Татлесосплав» конторасында дисятник булып эшли (1931), Мамадыш районының Соколка урман пунктында урман остасы ярдәмчесе булып эшли.

1941 елның июненнән Кызыл Армия сафларында. 1941 елның октябреннән Бөек Ватан сугышы фронтларында, 47 нче армиянең 3 нче гвардия механикалаштырылган корпусы 7 нче гвардия механикалаштырылган бригадасының сапёрлар отделениесе командиры. Кавказ, Кырым, Воронеж, 1 нче Украина һәм 1 нче Белоруссия фронтлары гаскәрләре составында Керчь ярымутравында һөҗүм һәм оборона сугышларында (1941–1942), Кавказ өчен сугышта (1942–1943), Белгород-Харьков (1943), Люблин-Брест (1944) һәм Варшава-Познань (1945) һөҗүм операцияләрендә катнаша.

Селище авылы (Украина ССРның Черкассы өлкәсе Канев районы) янында Днепр елгасын кичкәндә батырлык күрсәтә: 1943 елның 28 сентябрендә, беренчеләрдән булып, елганы йөзеп чыга, дошман контрһөҗүмнәрен кире кайтаруда һәм яулап алынган плацдармга миналар куюда катнаша. М.А.Просвирнин куйган миналарда дошманның 5 танкы шартлый.

Интендантлар училищесенең тизләтелгән курсын тәмамлый (1945).

1946 елдан запаста. Соколка авыл советы рәисе, Казан шәһәренең 22 нче заводының сакчылык взводы командиры, баржа шкиперы булып эшли.

Ленин ордены, медальләр белән бүләкләнә.

Герой бюстлары Мамадыш шәһәрендә һәм Соколка авылында урнаштырыла, Соколка авылында аның исеме белән урам атала.

Батырлар Китабы – Книга Героев. Казань, 2000;

Населённые пункты Республики Татарстан: иллюстрированная энциклопедия: в 3 т. Казань, 2021. Т. 2. С. 758, 765, 818, 819;

Книга Героев = Батырлар китабы / сост.: М.В.Черепанов, Е.В.Панов. Казань, 2022. С. 126.

Авторлар — М.З.Хәбибуллин, Л.М.Айнетдинова, Г.Х.Галимуллина