1923 елның 16 ноябре, Арча кантоны Осоко-Ковали авылы, хәзерге Зеленодольск районының юкка чыккан авылы — 1972 елның 19 мае, Казахстан ССР, Алма-Ата.

7 сыйныфны тәмамлаганнан соң, Казанда заводта слесарь булып эшли.

1939–1940 елларда һәм 1941 елның ноябреннән Кызыл Армия сафларында. Совет-фин сугышында катнаша.

1941 елның декабреннән Бөек Ватан сугышы фронтларында, 69 нчы армиянең 4 нче һөҗүм артиллериясе корпусы, 5 нче артиллерия дивизиясенең 23 нче гвардия җиңел артиллерия бригадасы 279 нчы җиңел артиллерия полкында разведка отделениесе командиры . Воронеж, Дала һәм 1 нче Белоруссия фронтлары гаскәрләре составында Харьков һөҗүм һәм оборона операцияләрендә (1943), Курск шәһәре өчен сугышта (1943), Люблин-Брест (1944), Варшава-Познань (1945) һөҗүм операцияләрендә катнаша.

Польшаны азат иткәндә батырлык күрсәтә. Люблин шәһәрендәге урам сугышларында дошманның ут нокталарын юк итә һәм укчы бүлекчәләргә һөҗүм итү мөмкинлеген тудыра. 1944 елның 1 августында Пулава  шәһәреннән 20 чакрым көньяктарак Висла елгасын кичә, штурм бүлекчәләре составында дошманның ут нокталары координатларын тапшыра. Дивизия тупларының утын көйләп, плацдармның киңәюенә булышлык итә.

1946 елда демобилизацияләнә. Белгород өлкәсе Губкин шәһәрендә (1964 елга кадәр), Алма-Атада яши һәм эшли.

Ленин ордены, Кызыл Йолдыз, 3 нче дәрәҗә Дан орденнары һәм медальләр белән бүләкләнә.

М.Е.Колчановның барельефы Зеленодольск шәһәрендәге Җиңү паркында Геройлар аллеясына урнаштырыла, бер урамга аның исеме бирелә.

Ханин Л. Герои Советского Союза – сыны Татарии. Казань, 1963;

Герои Советского Союза – наши земляки. Казань, 1984. Кн. 2;

Герои Советского Союза: краткий биографический словарь. М., 1987. Т. 1;

Батырлар китабы – Книга Героев. Казань, 2000;

Населённые пункты Республики Татарстан: иллюстрированная энциклопедия: в 3 т. Казань, 2021. Т. 2. С. 346, 347;

Книга Героев = Батырлар китабы / сост.: М.В.Черепанов, Е.В.Панов. Казань, 2022. С. 79.

Авторлар — М.З.Хәбибуллин, Л.М.Айнетдинова, Г.Х.Галимуллина