Исаев Алексей Петрович

1906 елның 18 апреле, Казан губернасы, Зөя өязе Малый авылы, хәзер Югары Ослан районы Исаево авылы – 1945 елның 22 гыйнвары, Будапешт шәһәре, Венгрия.

Дүрт сыйныфны тәмамлаганнан соң, колхозда эшли. Аннары Казанга күчеп килә һәм төрле төзелешләрдә һәм заводларда эшли.

1941 елдан Кызыл Армия сафларында.

1943 елдан Бөек Ватан сугышы фронтларында, 46 нчы армиянең 180 нче укчы дивизиясе 42 нче укчы полкның автоматчылар ротасында отделение командиры. Төньяк Кавказ, Көньяк-Көнбатыш фронтлар гаскәрләре составында Кавказ өчен барган сугышта (1943), Украина, Молдавия, Румыния, Болгария, Венгрияне азат итү сугышларында катнаша (1943–1945).

1945 елның 22 гыйнварында Будапешт өчен барган сугышта батырлык күрсәтә. Дошман пулемётын гәүдәсе белән каплап, үзенең подразделениесенә уңышлы һөҗүмне тәэмин итә.

Ленин ордены, 2 нче дәрәҗә Ватан сугышы, Кызыл Йолдыз орденнары белән бүләкләнә.

Югары Ослан авылында Геройлар паркында А.П.Исаев бюсты куела.

Туган авылы һәм Казан шәһәренең бер урамына А.П.Исаев исеме бирелгән.

Ханин Л. Герои Советского Союза — сыны Татарии. Казань, 1963; 

Считать живыми. Кишинёв, 1978; 

Бессмертные подвиги. М., 1980; 

Герои Советского Союза — наши земляки. Казань, 1982. Кн. 1;

Батырлар китабы — Книга Героев. Казань, 2000;

Населённые пункты Республики Татарстан: иллюстрированная энциклопедия: в 3 т. Казань, 2021. Т. 2. С. 14, 19, 30, 55;

Книга Героев = Батырлар китабы / сост.: М.В.Черепанов, Е.В.Панов. Казань, 2022. С. 68.

Авторлар — М.З.Хәбибуллин, Л.М.Айнетдинова, Г.Х.Галимуллина