Ильин Алексей Иванович

1923 елның 25 мае, Бөгелмә кантоны Аверьяновка авылы — 2014 елның 19 июне.

Казан югары партия мәктәбен тәмамлый (1958).

1950–1954, 1958–1962 елларда партия эшендә.

1962–1984 елларда Бөгелмә районының «Семеновод» тәҗрибә-җитештерү хуҗалыгында директор. Ильин җитәкчелегендә хуҗалыкта, туфракны төрле тирәнлектә яссы кисеп әйләндереп салу юлы белән эшкәртеп, туфрак саклагыч система кертелә, бөртекле культураларның уңышы 1 гектардан 15 ц дан 30-35 ц га кадәр арта, авыл хуҗалыгы культураларының элиталы орлыкчылык базасы булдырыла, мөгезле эре терлек комплексы, башка җитештерү объектлары төзелә, тәҗрибә-җитештерү хуҗалыгы республикада алдынгылар рәтенә чыга.

Бөек Ватан сугышында катнаша.

Ленин ордены, 2 нче дәрәҗә Ватан сугышы, «Почёт билгесе» орденнары, медальләр, шул исәптән СССР ВДНХсының алтын медале, ТАССР ЮС Президиумының Мактау грамотасы белән бүләкләнә.