Гарифуллин Габдулла Гарифулла улы

1925 елның 3 гыйнвары, Арча кантоны, хәзерге Балтач районы Яңгул авылы – 2002 елның 1 августы, шунда ук.

ФЗӨ мәктәбен (1940, Донецк шәһәре) тәмамлый. 1941–1942 елларда Чиләбе трактор заводында, Балтач районының «Яңа тормыш» колхозында эшли.

1942 елның августыннан Кызыл Армиядә.

1942 елның ноябреннән Бөек Ватан сугышы фронтларында, 5 нче удар армиянең 6 нчы артиллерия корпусы 2 нче артиллерия дивизиясе 20 нче җиңел артиллерия бригадасының 54 нче җиңел артиллерия полкында орудие командиры. 1 нче Белоруссия фронты гаскәрләре составында Эстония, Латвия, Литва, Көнчыгыш Пруссия һәм Польшаны азат итүдә (1944–1945 еллар), Берлинны алу операциясендә (1945 ел) катнаша.

1945 елның 23 апрелендә Берлин өчен барган сугышта батырлык күрсәтә. Берлин биналарының берсенә Кызыл флаг элә, ул җитәкчелек иткән расчёт сугышның бер тәүлегендә дошманның 9 станлы пулемётын, орудиесен, 8 фауст-патрончы һәм 30 лап автоматчыны юк итә.

Демобилизацияләнгәннән соң (1945), агрономнар курсларын (1952, Казан) тәмамлый.

Балтач районы «Сельхозтехника»сында слесарь, Яңгул авыл советы рәисе (1948–1949), Балтач районы «Большевик» колхозы рәисе (1953–1955), «Сельхозтехника»да нормировщик (1956–1990) булып эшли.

Ленин ордены, 1 нче дәрәҗә Ватан сугышы, Кызыл Йолдыз, 1 нче, 2 нче дәрәҗә Дан ордены, медальләр белән бүләкләнә.

Г.Г.Гарифуллин бюстлары Балтач шәһәр тибындагы поселогында Геройлар аллеясында һәм туган авылында урнаштырыла, шунда ук аның исеме белән урамнар һәм Яңгул мәктәбе атала.

Герои Советского Союза — наши земляки. Казань, 1982. Кн. 1;

Герои Советского Союза: краткий биографический словарь. М., 1987. Т. 1;

Батырлар китабы — Книга Героев. Казань, 2000;

Населённые пункты Республики Татарстан: иллюстрированная энциклопедия: в 3 т. Казань, 2018. Т. 1. С. 558, 599;

Книга Героев = Батырлар китабы / сост.: М.В.Черепанов, Е.В.Панов. Казань, 2022. С. 41.

Авторлар — М.З.Хәбибуллин, Л.М.Айнетдинова, Г.Х.Галимуллина