Фролов Павел Григорьевич

1909 елның 17 июле, Казан — 1991 елның 13 сентябре, Менделеевск шәһәре.

Тулы булмаган урта белем ала. 1926–1933 елларда Казанда киномеханик булып эшли, 1933 елдан Чаллы шәһәрендә кинотеатр директоры.

1940–1942 елларда шәһәр тибындагы Бондюг посёлогында (хәзер Менделеевск шәһәре) сөт-ит комбинаты директоры.

1942 елның апреленнән Кызыл Армия сафларында.

Кече лейтенантлар курсларын тәмамлый (1943).

1942 елның октябреннән Бөек Ватан сугышы фронтларында, 3 нче гвардия танк армиясенең 7 нче гвардия танк корпусы 23 нче гвардия мотоукчы бригадасының ут взводы командиры.

1 нче Украина фронты гаскәрләре составында Сталинград сугышында (1942–1943), Висла-Одер һөҗүм операцияләрендә (1945) катнаша.

1945 елның 23 гыйнварында Грошовице торак пункты янында (хәзер Польшаның Ополе шәһәре эчендә) Одер елгасын кичкәндә батырлык күрсәтә. Беренчеләрдән булып дошман уты астында елганы кичеп чыга. Фролов җитәкчелегендәге взвод, сугышып, дошманның үзйөрешле тубын, бронетранспортёрын сафтан чыгара, 3 пулемётын һәм 50 гә якын солдат һәм офицерларын юк итә. П.Г.Фролов сугышта яралана.

Демобилизацияләнгәннән соң Бондюг посёлогында яши, Л.Я.Карпов исемендәге химия заводында гражданнар оборонасы штабы башлыгы.

Ленин ордены, 1 нче дәрәҗә Ватан сугышы ордены, медальләр белән бүләкләнә.

Менделеевск шәһәрендәге Геройлар аллеясында П.Г.Фролов хөрмәтенә стела куела.

Исеме Казан урамына бирелә.​​​​​​​

Батырлар китабы – Книга Героев. Казань, 2000;

Населённые пункты Республики Татарстан: иллюстрированная энциклопедия: в 3 т. Казань, 2021. Т. 2. С. 853;

Книга Героев = Батырлар китабы / сост.: М.В.Черепанов, Е.В.Панов. Казань, 2022.

Авторлар — М.З.Хәбибуллин, Л.М.Айнетдинова, Г.Х.Галимуллина