Федин Михаил Александрович

1920 елның 22 сентябре, Спас кантоны Базяково авылы — 1948 елның 19 июле, Мари АССР, Волжск шәһәре.

Казанда машина-трактор остаханәсендә эшли.

1937 елда Лопатино посёлогына (1940 елдан Волжск шәһәре) күченеп китә, Мари кәгазь комбинатын төзүдә катнаша.

1940 елдан Кызыл Армия сафларында. Ерак Көнчыгышта Тын океан флотының торпеда катерларында хезмәт итә. 1943 елның февраленнән Бөек Ватан сугышы фронтларында, 7 нче гвардия һава десанты полкының отделение командиры (60 нчы армиянең 2 нче гвардия һава десанты дивизиясе). Воронеж фронты гаскәрләре составында Курск сугышында катнаша (1943).

1943 елның 8 октябрендә Медвин авылы янында (Украина ССРның Киев өлкәсе Чернобыль районы) Днепр елгасын кичкәндә батырлык күрсәтә. Беренчеләрдән булып елганы кичеп чыга, взвод белән җитәкчелекне үз өстенә ала, дошманның 8 һөҗүмен кире кайтара, аңа зур зыян китерә. Яралана, сугыш белән җитәкчлек итүне дәвам итә.

Демобилизациядән соң (1945), Волжск шәһәрендә яши, кирпеч заводы директоры булып эшли.

Ленин ордены, медальләр белән бүләкләнә.

Волжск шәһәрендәге бер урам Федин исемен йөртә, шәһәр паркында Геройга бюст куела.

Батырлар китабы — Книга Героев. К., 2000.

Автор — М.З.Хәбибуллин