Днепров Пётр Алексеевич

1919 елның 16 гыйнвары, Уфа губернасы, Минзәлә өязе Островка авылы – 1974 елның 23 июле, Киев.

Танкистлар мәктәбен тәмамлый (1941 ел).

Урта Азия геология трестында топограф булып эшли.

1939 елдан Кызыл Армия сафларында.

1941 елның июненнән Бөек Ватан сугышы фронтларында, 44 нче гвардия танк бригадасының танк батальоны командиры урынбасары (1 нче гвардия танк армиясенең 11 нче гвардия танк корпусы). Төньяк-Көнбатыш, Воронеж, 1 нче Украина, 1 нче һәм 2 нче Белоруссия фронтлары гаскәрләре составында Курск сугышында (1943 ел), Житомир-Бердичев, Львов-Сандомир (икесе дә – 1944 ел), Варшава-Познань һәм Берлин (икесе дә – 1945 елда) һөҗүм операцияләрендә катнаша.

1945 елның 14–18 гыйнварында Польша территориясендәге сугышта батырлык күрсәтә: П.А.Днепров җитәкләгән алдынгы разведка отряды Пилица елгасы ярына чыга, бригаданың бер өлешенә елганы кичүдә ярдәм итә, Бзура елгасы аша салынган миналанган күперне кулга төшерә, аны дошманга шартлатырга ирек бирми.

Сугыштан соң Киев шәһәрендә «Облпромбытгаз» предприятиесендә инженер булып эшли.

Ленин ордены, Кызыл Йолдыз ордены, медальләр белән бүләкләнә.

Батырлар китабы – Книга Героев. Казан, 2000;

Герои Советского Союза — наши земляки. Казань, 1982. Кн. 1;

Герои Советского Союза: Краткий биогр. словарь. М., 1987. Т. 1.

Автор – М.З.Хәбибуллин