Абызов Григорий Александрович

1919 елның 14 гыйнвары, Казан губернасының Чистай өязе (хәзер Түбән Кама районы) Елантау авылы – 1999 елның 30 сентябре, Севастополь шәһәре.

Җидееллык мәктәпне тәмамлагач, урман хуҗалыгында балта остасы булып эшли.

1940 елдан Кызыл Армиядә. 1941 елның июненнән Бөек Ватан сугышы фронтларында, 51 нче армиянең 91 нче укчы дивизиясе 321 нче артиллерия полкы туп командиры.

Көньяк һәм 4 нче Украина фронтлары гаскәрләре составында Сталинград сугышында, Кырым һәм Украинаны азат итү сугышларында катнаша.

1943 елның 12–23 октябрендә Мелитополь шәһәре өчен барган сугышта батырлык күрсәтә. Молочная елгасы ярында укчы гаскәрләр составында туптан туры төзәп атып, дошманның 5 авыр һәм 2 уртача авырлыктагы танкларын, штурм тубын, күп кенә ут нокталарын һәм солдатларын юкка чыгара.

Тбилиси хәрби артиллерия училищесен тәмамлаганнан соң (1949), Совет Армиясендә җитәкче вазифалар башкара.

1979 елдан отставкада.

Севастополь шәһәрендә яши.

Ленин, 1 нче дәрәҗә Ватан сугышы, ике Кызыл Йолдыз орденнары, медальләр белән бүләкләнә.

Истәлеге

Елантау авылында Абызов исеме белән урам атала, Чистайда Геройлар Аллеясында геройга стела куела.

Ханин Л. Герои Советского Союза — сыны Татарии. К., 1963;

Герои Советского Союза — наши земляки. К., 1982. Кн. 1;

Населенные пункты Республики Татарстан: иллюстрированная энциклопедия: в 3 т. Казань: Институт татарской энциклопедии и регионоведения АН РТ, 2021. Т. 3. С. 13, 30, 31;

Книга Героев = Батырлар китабы// сост.: М.В. Черепанов, Е.В. Панов. – Казань, 2022.