Сибирия

1912 елның 18 февраленнән 1913 елның 31 августына кадәр Томск шәһәрендә атнага 3–4 тапкыр татар телендә нәшер ителә, барысы 145 саны чыга.

Себердәге беренче татар газетасы.

Нашире һәм мөхәррире — М.Нәүрүзов, аннан соң Ф.Нәүрүзова.

«Сибирия» үзенең максаты итеп татар милләтенә хезмәт итүне куя.

Татар халкының милли үзаңын, татар мәдәниятен үстерү өчен көрәшә.

Актив авторлары арасында — Г.Абдуллин, Ш.Әхмәтҗанов, Н.Әхмәтов, И.Биккулов, Г.Борнаев, С.Ибраһимов, З.Кадыйри, Н.Кариев, Н.Карпов, М.Мозаффария, Н.Сәитов, Ф.Сөләймания, А.Туктабаев, Ф.Фәрит, Г.Хөсәенов, Ш.Якупов һ.б.

Эчке һәм тышкы сәясәткә, икътисад һәм сәүдәгә, урта һәм югары белемгә, татар мәдәниятенә багышланган мәкаләләр басыла.

Газета укучыларны Россиянең төрле төбәкләре: Бурятия, Казакъстан, Кыргызстан, Якутия, Байкал аръягы, Сахалин һәм Оренбург, Уральск, Чиләбе һәм башка шәһәрләр мөселманнары тарихы һәм гореф-гадәтләре белән таныштыра.

Күренекле шәхесләрнең биографияләре, фельетоннар, Ф.Ибраһимов, С.Кадрия, С.Сүнчәләй, Г.Тукай шигырьләре басыла.

Татар музыкасы һәм театры турындагы материалларга зур урын бирелә.

Даими рубрикалары: «Хатын-кызлар дөньясында», «Себер яңалыклары», «Мәктәп балалары өчен уку ярдәмлеге», «Югары уку йортлары һәм студентлар», «Татар дөньясы», «Файдалы киңәшләр» һәм башкалар.

Татар энциклопедиясе. Казан, 2016. Т.5;

Татарская периодическая печать: Научно-энциклопедическое издание. Казань, 2017.