Баллы

Куак елгасының уң кушылдыгы (Чишмә елгасы бассейны).

Озынлыгы 8,1 км, бассейнының мәйданы 27,2 км². Лениногорск районы территориясеннән ага. Елга башы Баллы авылыннан 1 км төньяктарак, тамагы Кузьминовка авылыннан көнчыгыштарак. Елга башының абсолют биеклеге 270 м, тамагыныкы – 110 м. Су җыелу мәйданының урманлылыгы 66%.

Баллы елгасының 2,9 км озынлыктагы бер кушылдыгы бар. Туенуы катнаш, күбесенчә кар сулары исәбенә. Җир асты туендыру модуле 0,51-1 л/с·км². Елга челтәренең тыгызлыгы 0,43 км/км². Елганың гидрологик режимы ташу вакытында су муллыгы һәм җәен нык саегуы белән характерлана. Елга тамагында суының иң аз вакытындагы уртача күпьеллык чыгымы 0,101 м³/с.

Баллы бассейнында бер буа бар. Су ресурслары сугару өчен кулланыла.