Вехов Николай Кузьмич

1887 елның 15 мае, Саратов губернасының Вольск шәһәре – 1956 елның 6 ноябре, Мәскәү.

Мәскәү авыл хуҗалыгы институтын тәмамлаганнан соң (1912), шунда ук эшли.

1919 елдан Казан авыл хуҗалыгы һәм урманчылык институтында, бер үк вакытта Раифа тәҗрибә-укыту урман хуҗалыгы мөдире.

1925–1932 елларда Урман-дала тәҗрибә-селекция станциясе директоры (Тула шәһәре).

1933 елдан Бөтенсоюз агроурманмелиорация фәнни-тикшеренү институтында хакимият-хуҗалык эшендә.

Хезмәтләре бакчачылыкта һәм яшелләндерүдә файдаланыла торган декоратив үсемлекләр булдыруга карый. Идел-Кама тыюлыгында дендрарий оештыручыларның берсе, матур чәчәк ата торган бакча ясмине, канәферләр, күпьеллык декоратив үсентеләр сортларын барлыкка китерүче.

Ленин ордены белән бүләкләнә.

Идел-Кама тыюлыгындагы (Зеленодольск районы) Садовый поселогы урамына Вехов исеме бирелә.