Байрак

Авылга 1926 елда Кәрәкәс авылы кешеләре нигез сала, соңрак Иштерәк авылы (хәзерге Тукай районы) һәм Сармашбаш авылы кешеләре күчеп килә.

Нигез салынган көннән авыл ТАССРның Чаллы кантоны Шәңгәлче волостенә керә. 1930 елның 10 августыннан – Чаллы, 1935 елның 10 февраленнән – Зәй, 1963 елның 1 февраленнән – Чаллы, 1972 елның 1 ноябреннән Зәй районында.

Хәзер Бигеш авыл җирлеге составына керә.

Күмәкләштерү елларында авылда “Байрак” колхозы оештырыла (беренче рәисе – Б.Лотфуллин). 1950 елдан зурайтылган “Урай” колхозы (Бигеш авылы) составында, 1959 елдан – “Алга” (шунда ук).

Хәзерге вакытта гаилә фермасы (умартачылык) эшли.

1950 елларда башлангыч мәктәп (1951 елга кадәр), клуб, су тегермәне эшли.

1949 елда – 125,
1958 елда – 102,
1970 елда – 74,
1979 елда – 57,
1989 елда – 21,
2002 елда – 10,
2010 һәм 2017 елларда – 9 кеше (татарлар).