Селище Говядино

Авыл 1647−1652 еллардан билгеле. Революциягә кадәрге чыганакларда 2 авыл: Селищи һәм Говядина буларак мәгълүм. Башта Зөя Успение Богородица монастыре карамагында була.

1764 елда халкы монастырь крәстияннәреннән – экономик, соңыннан дәүләт крәстияннәре катлавына күчерелә. Бу чорда халкының төп шөгыле – игенчелек һәм терлек асрау, он тарту кәсепчелеге таралган була.

Авыл Рус Шырданы авылының Петр һәм Павел чиркәве приходына карый.

XX йөз башында 4 тегермән, вак-төякләр кибете эшли. Бу чорда авыл җәмәгатенең имана җире 669 дисәтинә тәшкил итә.

1920 елга кадәр авыл Казан губернасының Зөя өязе Шырдан волостена керә. 1920 елдан ТАССРның Зөя кантонында. 1927 елның 14 февраленнән — Зөя, 1931 елның 20 октябреннән — Югары Ослан, 1963 елның 1 февраленнән Яшел Үзән районында.

Хәзер Олы Шырдан авыл җирлеге составына керә.

1958 елдан авыл − зурайтылган “Приволжье” (үзәк утары Протопоповка авылында), 1990 елдан “Шырдан” колхозлары составында (үзәк утары Олы Шырдан авылында, 1994 елдан күмәк предприятие, 2001−2003 елларда “Шырдан” авыл хуҗалыгы җитештерү кооперативы).

1782 елда — 151 ир заты;
1859 елда — 742,
1897 елда — 768,
1908 елда — 559,
1920 елда — 540,
1926 елда — 569,
1938 елда — 617,
1949 елда — 310,
1958 елда — 280,
1970 елда — 188,
1979 елда — 152,
1989 елда — 31,
2002 елда — 20,
2010 елда — 11,
2017 елда — 7 кеше (руслар).