Кече Пәлчикәү

Авылга XIX йөз башында алпавыт Е.Пальчиков тарафыннан Пәлчикәү (хәзер Иске Пәлчикәү) авылыннан күчерелгән крепостной крәтияннәр нигез сала. Революциягә кадәрге чыганакларда Никольский Пүчинкәсе, Пәлчикәү Пүчинкәсе исемнәре белән дә мәгълүм.

Авыл янында Пальчиковларның “Отрада” утары урнашкан була. Бу чорда халкының төп шөгыле – игенчелек һәм терлекчелек, көпчәк ясау һәм вак һөнәрчелек кәсепчелеге таралган була.

1870 ел мәгълүматларына караганда, авылда су тегермәне, XX йөз башында шулай ук икмәк саклау һәм сату кибете эшли.

Бу чорда авыл җәмәгатенең имана җире 503 дисәтинә тәшкил итә. 1912−1913 еллардагы хуҗалык санын исәпкә алу мәгълүматларына караганда, 53 хуҗалыкның 19 ында ат юк, 31 – бер, ике, 3 хуҗалык өч һәм күбрәк эш аты тота; 586 баш мөгезле эре һәм башка терлек теркәлә. 49 хуҗалык төрле кәсеп белән шөгыльләнә.

1920 елга кадәр авыл Уфа губернасының Минзәлә өязе Токмак волостена керә. 1920 елдан ТАССРның – Минзәлә, 1922 елдан Чаллы кантонында. 1930 елның 10 августыннан – Ширәмәт, 1935 елның 10 февраленнән – Зәй, 1963 елның 1 февраленнән – Чаллы, 1972 елның 1 февраленнән Зәй районында.

Хәзер Югары Шепкә авыл җирлеге составына керә.

1925−1927 елларда авылга Соболеково авылыннан (хәзер юкка чыккан, Түбән Кама районы) 16 крәстиян гаиләсе күчеп килә.

Күмәкләштерү елларында авылда “Кызыл Зәй” колхозы оештырыла. 1950 елдан − зурайтылган “Объединение” (Иске Пәлчекәү авылы), 1958 елдан “Коммунизмга юл” (Югары Шепкә авылы) колхозлары составында.

1859 елда – 261,
1913 елда – 264,
1920 елда – 299,
1926 елда – 193,
1949 елда – 201,
1958 елда – 130,
1970 елда – 63,
1979 елда – 33,
1989 елда – 16,
2002 елда – 11,
2010 елда – 19,
2017 елда – 20 кеше (руслар – 85%, татарлар – 15%).