Дмитров

Авылга 1926 елда “Хезмәт һәм белем” (җитәкчесе – В.А.Голговский) авыл хуҗалыгы коммунасы әгъзалары элек Алабуга сәүдәгәре И.И.Стахеевныкы булган Каменный хуторы урынында нигез сала.

Нигез салынган көннән авыл ТАССРның Чаллы кантоны Зәй волостена керә. 1930 елның 10 августыннан – Ширәмәт, 1935 елның 10 февраленнән – Зәй, 1963 елның 1 февраленнән – Чаллы, 1972 елның 1 ноябреннән Зәй районында.

Хәзер Попов авыл җирлеге составына керә.

1934 елда коммуна Г.Димитров исемендәге колхозга үзгәртелә (авыл исеме шуннан). 1950 елдан зурайтылган “Заветы Ильича” колхозы (Зәй шәһәре), 1970 елдан – шул ук исемдәге совхоз, 1997 елдан – “Нива” авыл хуҗалыгы җитештерү кооперативы (кырчылык) (2006 елдан җаваплылыгы чикләнгән җәмгыять) составында.

Авылда фельдшер-акушерлык пункты эшли.

1938 елда – 256,
1949 елда – 111,
1958 елда – 118,
1970 елда – 187,
1979 елда – 114,
1989 елда – 87,
2002 елда – 97,
2010 елда – 124,
2017 елда – 121 кеше (руслар – 59%, татарлар – 39%, шул исәптән керәшен татарлар – 16%).