Байлар

1862 елда Байлар волостеның Димтамак, Әбсәләм һәм Илчембәт авыллары асабалары тарафыннан нигезләнә. Беренче исеме – Яңа Байлар.

Бу чорда халкының төп шөгыльләре – игенчелек һәм терлекчелек, шулай ук читкә китеп эшләү, умартачылык тарала.

1889 елгы мәгълүматларга караганда, авылда мәчет була. XIX йөз ахырында авыл җәмәгатенең имана җире 2480 дисәтинә тәшкил итә.

1920 елга кадәр авыл Самара губернасының Бөгелмә өязе Александровка волостена керә. 1920 елдан – ТАССРның Бөгелмә кантонында.

1930 елның 10 августыннан – Баулы, 1935 елның 10 февраленнән – Ютазы, 1963 елның 1 февраленнән – Бөгелмә, 1965 елның 12 гыйнварыннан – Баулы, 1991 елның 6 апреленнән Ютазы районында.

Хәзер – Урыссу авыл җирлегендә.

1930 елда авылда «Кальяр» колхозы оештырыла. 1950 елда – Каганович исемендәге колхозның (аңа шулай ук Аксакүл, Какылы Күл авыллары хуҗалыклары да керә) үзәк утары. 1957 елдан Фрунзе исемендәге колхоз (аңа юкка чыккан Подлесный Кордон поселогы хуҗалыклары өстәлә), 1993 елдан – «Фрунзе» акционерлык җәмгыяте, 1995 елдан «Байлар» күмәк хуҗалыгы, 2004 елдан – «Игенче» җаваплылыгы чикләнгән җәмгыяте эшли.

Халкы башлыча «Игенче» җаваплылыгы чикләнгән җәмгыятедә эшли, үсемлекчелек, ит-сөт терлекчелеге белән шөгыльләнә.

Авылда мәдәният йорты һәм китапханә (икесе дә – 1937 елдан мәчет бинасында, 1971 елдан – яңа бинада), мәчет (2001 елдан); мәдәният йорты каршында «Байлар кызлары» вокаль коллективы (2021 елдан) эшли.

1889 елда – 320,
1897 елда – 573,
1920 елда – 648,
1926 елда – 577,
1949 елда – 657,
1958 елда – 581,
1970 елда – 639,
1979 елда – 578,
1989 елда – 474,
2002 елда – 435,
2010 елда – 436,
2020 елда – 409 кеше (татарлар).