Исаево

1651 елдан Малая исеме (бу исемне 1963 елның 13 июленә кадәр йөртә) белән мәгълүм.

1861 елгы реформага кадәр халкы алпавыт крәстияннәре катлавына керә. Бу чорда халкының төп шөгыле – игенчелек, терлекчелек.

XX йөз башында авылда укырга-язарга өйрәтү мәктәбе (1887 елдан),  2 җил тегермәне эшли. Авыл җәмәгатенең имана җире 841 дисәтинә тәшкил итә.

Халкы Спас чиркәве приходына керә (Олан авылы).

1920 елга кадәр Казан губернасының Зөя өязе Келәнче волостенда. 1920 елдан ТАССРның Зөя кантонында. 1927 елның 14 февраленнән – Зөя, 1931 елның 20 октябреннән – Югары Ослан, 1963 елның 1 февраленнән – Яшел Үзән, 1965 елның 12 гыйнварыннан Югары Ослан районында.

Хәзер Макыл авыл җирлеге составына керә.

1931 елда авылда “Новый путь” колхозы оештырыла, 1957 елдан эреләндерелгән Ленин исемендәге колхоз (Рус Макылы авылы, 1970 елда “Знамя Ленина” совхозы итеп үзгәртелә) составында. 1996–2016 елларда “Исаево” крәстиян-фермер хуҗалыгы үзәк утары.

А.П.Исаев (1906–1945) – сержант, Советлар Союзы Герое, туган авылы һәм Казанның бер урамы аның исеме белән атала.

1782 елда – 115 ир-ат;
1859 елда – 357,
1897 елда – 467,
1908 елда – 532,
1920 елда – 539,
1926 елда – 555,
1938 елда – 500,
1949 елда – 550,
1958 елда – 232,
1970 елда – 91,
1979 елда – 40,
1989 елда – 21,
2002 елда – 11,
2010 елда – 7,
2017 елда – 6 кеше (руслар, татарлар).