Күперле

1719–1722 еллардан мәгълүм. 1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек, терлекчелек, умартачылык.

XX йөз башында авылда мәчет, мәктәп, су һәм җил тегермәннәре, 2 ярма яргыч, тимерчелек эшли. Авыл җәмәгатенең имана җире 909 дисәтинә тәшкил итә.

1920 елга кадәр авыл Уфа губернасының Минзәлә өязе Әхмәт волостена керә. 1920 елдан – ТАССРның Минзәлә, 1922 елдан – Чаллы кантонында. 1930 елның 10 августыннан – Чаллы (1976 елның 20 апреленнән – Тукай) районында.

Хәзер – Яңа Троицкий авыл җирлегендә.

1930 елда «Туры юл» колхозы оештырыла. 1957 елдан авылда – «Татарстан» колхозы (үзәк утары – «Татарстан» совхозы поселогы), 1965 елдан – «Новотроицкий» совхозы (КамАЗның ярдәмче хуҗалыгы, үзәк утары –Яңа Троицкий авылы), 1996–2004 елларда – шул ук исемдәге җаваплылыгы чикләнгән җәмгыяте, 2011 елдан «Тукаевский племрепродуктор» җаваплылыгы чикләнгән җәмгыяте эшли.

Халкы башлыча үсемлекчелек һәм терлекчелек белән шөгыльләнә.

Авылда клуб (1972 елдан), фельдшер-акушерлык пункты (2012 елдан), мәчет (2005 елдан) бар.

Т.Б.Харисов (1953 елда туган) – педагог, педагогика фәннәре докторы, профессор, Татарстан Республиксының атказанган укытучысы.

1870 елда – 475,
1897 елда – 634,
1913 елда – 762,
1920 елда – 746,
1926 елда – 486,
1938 елда – 470,
1949 елда – 316,
1958 елда – 278,
1970 елда – 329,
1979 елда – 264,
1989 елда – 169,
2002 елда – 186,
2010 елда – 186,
2020 елда – 189 кеше (татарлар).