Чәбки-Саба

XVIII йөзнең беренче яртысында нигезләнә. Революциягә кадәрге чыганакларда Чаука, Чабья исемнәре белән искә алына.

XVIII йөздә – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында авылда мәчет (1888 елда төзелә), мәктәп, 4 вак-төякләр кибете эшли. Авыл җәмәгатенең имана җире 828,2 дисәтинә тәшкил итә.

1920 елга кадәр авыл Казан губернасының Мамадыш өязе Сатыш волостена керә.

1920 елдан – ТАССРның Мамадыш кантонында. 1930 елның 10 августыннан – Саба районында.

Хәзер – Сатыш авыл җирлегендә.

Күмәкләштерү елларында «Кызыл батыр» колхозы оештырыла (беренче рәисе – В.Шәйдуллин). Халкы башлыча игенчелек һәм терлекчелек белән шөгыльләнә.

Авылда мәчет (2015 елдан) бар.

Авыл янында археология истәлеге – Чәбки-Саба авыллыгы (гомумболгар ядкәре) табыла.

А.Я.Хәсәнова (1952 елда туган) – Татарстан Республикасының атказанган артисты.

1782 елда – 48 ир-ат;
1859 елда – 179,
1897 елда – 325,
1908 елда – 372,
1920 елда – 356,
1926 елда – 345,
1938 елда – 302,
1949 елда – 186,
1970 елда – 126,
1979 елда – 97,
1989 елда – 65,
2002 елда – 52,
2010 елда – 52,
2020 елда – 39 кеше (татарлар – 97,5%).