Мәмли Казак Чаллысы

Рус чыганакларында 1652 елдан Новая Мазля буларак мәгълүм. XVIII йөздә – XIX йөзнең беренче яртысында халкы дәүләт крәстияннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында мәчет һәм 2 вак-төякләр кибете эшли. Авыл җәмәгатенең имана җире 520,3 дисәтинә тәшкил итә.

1920 елга кадәр авыл Казан губернасының Лаеш өязе Шомбыт волостена керә. 1920 елдан – ТАССРның Лаеш кантонында. 1927 елның 14 февраленнән – Балык Бистәсе, 1935 елның 10 февраленнән – Кызыл Йолдыз, 1959 елның 26 мартыннан – Балык Бистәсе, 1963 елның 1 февраленнән – Мамадыш, 1965 елның 12 гыйнварыннан – Балык Бистәсе районында.

Хәзер – Котлы Бөкәш авыл җирлегендә.

1956–1986 еллардагы мәгълүматлар буенча, авылда Калинина исемендәге колхоз (үзәге Тәберде Чаллысы, соңрак, 1992 елгы мәгълүматлар буенча, Котлы Бөкәш авылларында урнаша).

Халкы башлыча «Марат» крәстиян-фермер хуҗалыгында, Р.Х.Хәмидуллин гаилә фермасында (атлар үрчетү) хезмәт куя.

2015 елга кадәр башлангыч мәктәп эшли. Клуб, фельдшер-акушерлык пункты, мәчет (1994 елда реставрацияләнә) бар.

Авылдан көнбатыштарак эпиграфика истәлекләре – турыпочмаклык рәвешендәге, өске ягы уксыман аркалы 3 кабер ташы (XVI йөзнең беренче яртысы) сакланган.

1782 елда – 59 ир-ат;
1859 елда – 410,
1897 елда – 656,
1908 елда – 819,
1920 елда – 819,
1926 елда – 702,
1938 елда – 1077,
1949 елда – 530,
1958 елда – 454,
1970 елда – 524,
1989 елда – 268,
2002 елда – 257,
2010 елда – 231,
2020 елда – 219 кеше (татарлар – 98%).