Гремячка

1619 елдан Кривуши авылы буларак мәгълүм. Революциягә кадәрге чыганакларда Покровское исеме белән дә искә алына.

1861 елгы реформага кадәр халкы алпавыт крәстияннары катлавына керә. Бу чорда халкының төп шөгыльләре – игенчелек һәм терлекчелек, шулай ук чүлмәк ясау, итек тегү, сарык тиресе иләү, көпчәк ясау тарала.

1756 елда алпавыт Л.Ф.Аристов хисабына Покров чиркәве төзелә (1930 елларда ябыла; хәзер ярымҗимерек хәлдә; классицизм элементлары булган барокко стилендәге дини архитектура истәлеге).

XX йөз башында Покров чиркәве, чиркәү-приход мәктәбе (1898 елдан, 1884 елда укырга-язарга өйрәтү мәктәбе буларак ачыла, 1916 елда 12 ир бала һәм 21 кыз бала укый) эшли. Авыл җәмәгатенең имана җире 386 дисәтинә тәшкил итә.

1920 елга кадәр авыл Казан губернасының Лаеш өязе Уракчы волостена керә. 1920 елдан – ТАССРның Лаеш кантонында. 1927 елның 14 февраленнән – Балык Бистәсе, 1963 елның 1 февраленнән – Питрәч, 1965 елның 12 гыйнварыннан – Балык Бистәсе районында.

Хәзер – Троицкий Урай авыл җирлегендә.

1930 елда – «Искра», 1931 елда «9 гыйнвар» колхозлары оештырыла. 1958 елдан авылда –«Пятилетка» колхозы, 1969 елдан – «Береговой» совхозы (икесенең дә үзәге – Троицкий Урай авылы), 1993 елдан бүленеп чыккан «Гремячка» совхозы эшли.

Халкы башлыча «Ногманов» крәстиян-фермер хуҗалыгында хезмәт куя.

2007 елга кадәр – мәктәп, 2014 елга кадәр клуб эшли. Авыл территориясендә төзекләндерелгән «Гремячий» чишмәсе бар.

Авыл тирәсендә археология истәлекләре – Гремячка I (Казан яны культурасы), II (Казан яны, Маклашеевка культуралары), III (Казан яны культурасы) һәм IV (Маклашеевка культурасы), Гремячка каберлеге (Азелино культурасы) табыла.

С.Г.Александров (1873–1967) – «Варяг» крейсеры матросы (1899–1904), Гражданнар сугышында катнашучы, 4 нче дәрәҗә Георгий хачы кавалеры, авылда аның кабере сакланган, кабер ташы куелган (2015 елда яңартылган), авылның бер урамы аның исеме белән атала.

1782 елда – 169 ир-ат;
1859 елда – 251,
1897 елда – 491,
1926 елда – 611,
1938 елда – 684,
1949 елда – 538,
1958 елда – 478,
1970 елда – 315,
1989 елда – 169,
2002 елда – 121,
2010 елда – 73,
2019 елда – 60 кеше (руслар – 86,7%, татарлар – 13,3%).