Благодаровка

XVIII йөздә нигезләнә. Революциягә кадәрге чыганакларда Вольная Алькина авылы буларак та искә алына.

XX йөз башында авыл җәмәгатенең имана җире 300 дисәтинә тәшкил итә.

1920 елга кадәр поселок Казан губернасы Чистай өязенең Изгар волостена керә. 1920 елдан – ТАССРның Чистай кантонында. 1930 елның 10 августыннан – Яңа Чишмә, 1935 елның 10 февраленнән – Кызыл Армия, 1958 елның 23 маеннан – Чистай, 1983 елның 26 апреленнән – Яңа Чишмә районында.

Хәзер – Чабаксар авыл җирлегендә.

1929 елда поселокта «Воля» колхозы оештырыла. 1950 елдан – берләштерелгән Калинин исемендәге колхоз (үзәк утары – Чуаш Чабаксары авылы), 1957 елдан – «Алга» совхозы (үзәк утары – Чистай районы Изгар авылы; Благодаровка поселогы – совхозның 3 нче бүлекчәсендә), 1974 елдан – «Закамский» совхозы (үзәк утары – Благодаровка поселогы; совхоз шулай ук Рус Чабаксары, Чуаш Чабаксары, Татар Алкины, юкка чыккан Чудиновка поселоклары хуҗалыкларын берләштерә. 1991 елда «Закамский» совхозыннан «Чебоксарский» совхозы аерылып чыга; үзәк утары – Рус Чабаксары авылы; 1992 елгы мәгълүматлар буенча, «Закамский» совхозының үзәк утары Чуаш Чабаксары авылына күчерелә), 1995–2004 елларда – «Закамский» авыл хуҗалыгы җитештерү кооперативы, хәзерге вакытта – «Игенче» җаваплылыгы чикләнгән җәмгыяте эшли.

Халкы башлыча үсемлекчелек һәм сөт терлекчелеге белән шөгыльләнә.

1859 елда – 81,
1897 елда – 144,
1908 елда – 189,
1920 елда – 187,
1926 елда – 202,
1938 елда – 163,
1949 елда – 140,
1958 елда – 68,
1970 елда – 83,
1979 елда – 133,
1989 елда – 76,
2002 елда – 87,
2010 елда – 82,
2020 елда – 68 кеше (чуашлар).